كلن يبين خافيه من كلامه=مهما يخبي عنك تعرف مايخفيك
في نظرته في لفتته في اهتمامه=تعرف صديقك يافتى من اعاديك
واللي يبيعك عند حال السلامه=في حال مخطر لاتفكر بيشريك
بالشده تعرف صقرها م الحمامه=ولاالرخى كلن بالاقوال يرضيك
اوصيك يا راسي تنقى العمامه=اللي تسرك بالمحافل ماتخزيك
خاوي نزيهن يدري معنى الكرامه=واصحى تخاوي النذل واصحى يخاويك
الوافي حطه فوق راسك غمامه=والنذل يحشم عنه حتى مواطيك
والناس ماهي بالحلا والوسامه=اصحى المظاهر عن مخابرها تعميك
كم سيف غمده ما انتفع به حسامه=زخراف غمده لاانثنى مابينجيك
ولااليماني وإن تنحل قوامه=وشفته ردي الشكل فعله بيكفيك
وكلن بعينه من ضميره علامه=مثل الدليل اللي يدلك خطاويك
بس انت لاتسوي سوات النعامه=وتغش حالك بالاودم حذاريك
الحب يعمي والتسرع ندامه=وإن ضلك الله مافي مخلوق يهديك
ومن لايحوز من التجارب علامه=مهما تفيده جاهلن عن مباديك
خل الغبي عايش بجهله وظلامه=دام إنه من تشعله النور يوذ يك
وصون الجواهر والحكم عن لمامه=مايصير ترمي بالمزابل لئاليك
وارعى حلال الله وجانب حرامه=واسأل الهاك من خنا ابليس يحميك
لاتغرك الدنيا ورانا القيامه=واللي يسرك بالقيامه تساميك
لايكون تشري الفانيه بالاقامه=في جنة الفردوس تفشل مساعيك
ومن يفقد الله لووجد كل خامه=فقير لاتحسب سوى لله يغنيك ا
الخميس 16 يونيو 2011, 9:13 pm
